Feb 21, 2024 / Lain-lain
Copy Link

Hade Gogog Hade Tagog - Mieling Hari Bahasa Ibu Internasional

SDM7BDG- Ilaharna kolot baheula nitipkeun budak ka sakola atawa ka madrasah teh, dumeh ngaku teu boga elmu minuhan eusi sirah budakna.  Kolot baheula teh lolobana  ngaku ngan bisa minuhan eusi beuteungna. Pangakuan anu clik putih clak herang. Estuning ka luar tina sanubari nu wening. Ku ikhlasna pamadegan eta teh, ngabalukarkeun ikhlasna guru ngatik ngadidik barudak jadi jeneng. Luhur ku elmu jembar ku pangabisa. 

    Adab jeung tatakrama sumawonten bahasa,  biasana tos diatik ku kolotna ti imahna keneh. Majarkeun eta teh tangung jawab anu jadi indung jeung bapakna. 

   Inget keneh mun urang ngalakukeun laku nu teu nyeni, kontan ku indung teh sok digeungeureuhkeun. Sakapeung sok dicepret ku nyere. Lain nyepret keuheul tapi inggis ku bisi rempan ku sugan, budak teh atah ajar. Bakating ku nyaah salempang hariwang budak teh jadi nakal, sugal, jeung garihal.

    Tujuan kolot teh rek singkil purikil, waspada permana tingal, ngajaga ngariksa budak ulah jadi budak sombong, bedegong, borogong, jeung gede bohong. 

    Harepan kolot ka budakna kudu jadi jalma alewoh, hade gogog hade tagog, ajrih ka sasama, capetang perentang. Hade basa hade rupa.

Selamat memperungati Hari Bahasa Ibu Internasional!

"Bahasa indung bahasa nu luhung bahasa Sunda kapigandrung"

Sumber:http://sdm7bdg.sch.id/beritadetail/Hade+Gogog+Hade+Tagog+-+Mieling+Hari+Bahasa+Ibu+Internasional


Penulis : Iwan Kurniawan, M.Ag.

---

  8  Menyukai